இஸ்லாம் என்பது ஒரு குறிப்பிட்ட இனத்திற்கோ, நாட்டிற்கோ, மொழிக்கோ சொந்தமான மதமல்ல. மனிதனைப் படைத்த ஒரே இறைவனை அறிந்து, அவனை மட்டும் வணங்கி, அவன் காட்டிய வழியில் வாழ்வதே இஸ்லாம்.
“இஸ்லாம்” என்ற அரபுச் சொல், இறைவனுக்கு மனப்பூர்வமாகக் கீழ்ப்படிதல், அவனிடம் தன்னை ஒப்படைத்தல், அதன் மூலம் உண்மையான அமைதியை அடைதல் என்ற கருத்துகளை உள்ளடக்கியது.
ஒருவர் முஸ்லிமாக இருப்பதன் பொருள்:
“என் வாழ்க்கை என் விருப்பப்படி மட்டும் இயங்குவதற்காக அல்ல. என்னைப் படைத்த இறைவன் காட்டிய நல்வழியில் வாழ்வதற்காக நான் உருவாக்கப்பட்டேன்”
என்று ஏற்றுக்கொள்வதாகும்.
இஸ்லாமின் அடிப்படைச் செய்தி மிகவும் எளிமையானது:
வணக்கத்திற்குரிய இறைவன் அல்லாஹ்வைத் தவிர வேறு யாரும் இல்லை. முஹம்மது ஸல்லல்லாஹு அலைஹி வஸல்லம் அவர்கள் அல்லாஹ்வின் தூதர்.
இது இரண்டு உண்மைகளை உள்ளடக்கியது:
ஒன்று: அல்லாஹ்வை மட்டும் வணங்குதல்
- மனிதரை வணங்கக்கூடாது.
- நபிமார்களை வணங்கக்கூடாது.
- சிலைகள், கிரகங்கள், இயற்கைச் சக்திகள் ஆகியவற்றை வணங்கக்கூடாது.
- மறைந்த நல்லடியார்கள் அல்லது வேறு சக்திகளிடம் இறைவனுக்குரிய உதவியை வேண்டக்கூடாது.
- படைத்தவனை மட்டுமே வணங்க வேண்டும்.
இரண்டு: இறைவன் அனுப்பிய தூதரைப் பின்பற்றுதல்
அல்லாஹ்வை எவ்வாறு வணங்குவது என்பதை மனிதன் தானாக உருவாக்க முடியாது. அதற்காக அல்லாஹ் நபிமார்களை அனுப்பினான்.
முஹம்மது ஸல்லல்லாஹு அலைஹி வஸல்லம் அவர்கள் இறுதி நபி என்பதால், அவர்களின் வழிகாட்டுதலை ஏற்றுப் பின்பற்றுவது இஸ்லாமின் ஒரு பகுதியாகும்.